Microsoft sê jammer oor Winehouse-tweet
2011-07-26 10:20
Londen – Die sagteware- en tegnologiereus Microsoft het om verskoning gevra ná daar op een van die maatskappy se Twitter-profiele 'n beroep gedoen is om die oorlede Britse sangeres Amy Winehouse te eer deur haar album van die blad Zune af te laai.
Volgelinge van die Britse @tweetbox360 het galbitter gereageer en Microsoft berispe.
“Smaakvol,” het een volgeling kortaf getweet.
“Microsoft – ‘n mislukking op sosiale media,” het ‘n ander getweet.
“Bietjie kras?” het ‘n nog ‘n gebruiker getweet voordat Microsoft sowat ‘n uur later probeer verduidelik het.
“Ons vra om verskoning aan dié wie aanstoot oor ons Amy Winehouse-tweet geneem het,” het die maatskappy getweet. “As dit kommersieel gedrewe geklink het; dit was nie, ons kan julle verseker.”
Kort daarna het die maatskappy sy bemarkingsfoefie laat vaar en wéér getweet.
“Met die dood van Amy Winehouse het die wêreld ‘n uiters talentvolle kunstenaar verloor. Ons gedagtes is by Amy se familie en vriende in hierdie tyd.”
– Lees meer hier.
– Volg Nuus24 op Twitter.