Meteoriete in Rusland gevind

2013-02-18 13:18

Moskou – Wetenskaplikes het meteoriete gevind wat afkomstig is van die meteoor wat verlede week bo die Chelyabinsk-streek (van die Urals) in Rusland in die atmosfeer ontplof het.

Die ontploffing het 'n skokgolf veroorsaak wat sowat 1 200 mense beseer het en meer as ‘n duisend huise beskadig het.

Wetenskaplikes wat ‘n klein meer deursoek het waar stukke van die meteoor geval het, kon niks in 'n aanvanklike soektog vind nie. Die RIA Novosti-nuusagentskap het egter Maandag berig dat lede van die Russian Academy of Sciences, wat Sondag chemiese toetse op ongewone rotsmateriaal uitgevoer het, tot die gevolgtrekking gekom het dat die rotsmateriaal wel van die ruimte afkomstig is.

“Ons kan bevestig dat die deeltjies van ‘n stof wat deur ons groep naby die Chebarkul-meer gevind is, inderdaad die samestelling van 'n meteoriet het,” het die wetenskaplike Viktor Grokhovsky Sondagaand gesê.

Meer as 40 mense sterk nog in die hospitaal aan ná hulle as gevolg van die skokgolf beseer is. Baie mense is beseer toe glas van gebreekte vensters hulle getref het.

Sowat 24 000 nooddienswerkers en vrywilligers het oor die naweek die gebreekte vensters vervang.

Dié meteoriete het ook heelwat belangstelling by versamelaars gelok. Party mense op die internet het sowat $10 000 (sowat R88 000) aangebied vir ‘n enkele meteoriet.

– Volg Nuus24 op Twitter
 

- Sapa - AFP