Merkbare styging in hoeveelheid kuberaanvalle
2011-09-30 09:10
Idaho Falls – Amerikaanse diensteverskaffers loop deur onder 'n stygende hoeveelheid kuberaanvalle deur aanvallers wat toenemend gesofistikeerde metodes gebruik, het 'n senior amptenaar van die VSA se departement van binnelandse veiligheid (DHS) gesê.
Dié onthulling is gemaak tydens die regering se eerste mediatoer van verdedigingslaboratoriums wat die veiligheid van die Amerikaanse krag- en waterverskaffingsnetwerk, sowel as ander infrastruktuur, moet beskerm.
Greg Schaffer, waarnemende adjunksekretaris van die departement, het Donderdag aan verslaggewers gesê diensteverskaffers oor die wêreld heen loop 'n al groter risiko om deur kuberkrakers geteiken te word omdat toerusting en masjinerie al hoe meer aan die internet gekoppel word.
"Ons koppel toerusting wat nooit voorheen gekoppel is nie aan hierdie globale netwerke," het Schaffer gesê. Voormalige werknemers, kuberkrakers en selfs buitelandse regerings "klop aan die deure van hierdie stelsels, en daar het al betreding plaasgevind."
Veiligheidskenners het volgens die DHS in 2010 op 116 aansoeke om bystand gereageer, terwyl daar in 2011 reeds 342 was.
Amptenare van die departement wou weens vertroulikheidsklousules met die betrokke maatskappye nie nadere besonderhede bekendmaak oor sy presiese werksaamhede nie.
Die DHS se kuberbedrywighede sluit in 'n noodreaksiespan, 'n analisesentrum waar stelsels se veiligheid getoets word, 'n laboratorium waar moontlike bedreigings ondersoek word en 'n geheime sentrum vanwaar besonderhede oor bedreigings met ander kubersekerheidsmaatskappye en intelligensiedienste gedeel word.
– Volg Nuus24 op Twitter.
- Sapa - AP