Menslike gene in diere - debat heropen
2009-11-11 17:26
Londen - Britse wetenskaplike wil die debat rondom eksperimente met menslike materiaal in diere heropen.
Die land se akademie vir mediese wetenskap het Dinsdag 'n studie van stapel gestuur om te bepaal of dié soort eksperimente aanvaarbaar is, en verder gestoot kan word.
Wetenskaplikes het reeds 'n groep resus-makaak-ape ontwikkel met die menslike geen vir Huntington se siekte om dié mediese toestand beter te kan ondersoek.
Muise is ook al ontwikkel met lewers wat met menslike selle gekweek is. Dié diere word gebruik om die invloed van sekere dwelmmiddels op die menslike lewer te bestudeer.
Wetenskaplikes by die akademie wil egter weet of dié navorsing verder gevat kan word.
Die studie sal na verwagting sowat 'n jaar duur.
Studieleiers hoop om riglyne daar te stel wat wetenskaplikes 'n aanduiding sal gee van hoe ver die publiek bereid is om te gaan met die kruising van mens- en dieregene om siektes na te vors en te beveg.
"Lei hierdie kombinasies tot 'n vraag rondom wat dit beteken om 'n mens te wees?" het Martin Bobrow, 'n professor in mediese genetika by Cambridge-universiteit, gevra.
"Dis belangrik dat sulke vrae oorweeg word sodat die grense só opgestel kan word dat die navorsing sy volle potensiaal kan bereik," het Bobrow, die voorsitter van 'n groep van 14 lede wat die kwessie ondersoek, gesê.
- Sapa-AFP