Mense vies ná jagluiperd gejag is
2011-11-23 09:02
Namibiërs is ongelukkig oor die jag van ’n tamaai jagluiperd, glo die grootste wat nog ooit gejag is.
Johan van der Westhuizen van Alberton het die jagluiperd op 22 April in Khomas, Namibië, ná ’n jagtog van etlike uur doodgeskiet.
“Ek het geweet dit is ’n groot kat, maar het nie besef dit sal ’n nuwe wêreldrekord wees nie,” het Elaine Coetzee, ’n professionele jagter van CEC Safaris, gesê. Sy het Van der Westhuizen begelei.
Die jagluiperd is volgens die Internasionale Safariklub (SCI) vir jagters die grootste wat tot nog toe wêreldwyd gejag is.
“Die kat se grootte word gemeet van die agterkop se verste punt tot die punt van die bokaak, en dan ook oor die wydte van die kop. Die syfers word bymekaar getel.
“Die vorige rekord vir ’n jagluiperd was 368 cm en hierdie een was 375 cm. Sy kop was omtrent dieselfde grootte as ’n volwasse luiperdmannetjie s’n,” het Coetzee verduidelik.
Volgens haar moes hulle maande wag om te hoor of dit ’n nuwe rekord is. Hulle is op 7 November ingelig dit is wél volgens die SCI ’n nuwe wêreldrekord.
Lesers van die Namibiese koerant die Republikein, asook omgewingskenners, het beswaar gemaak nadat ’n foto van die jagluiperd op 27 Oktober op dié koerant se voorblad gepryk het.
Onder hulle was die bekende omgewingsbewaarder Peter Cunningham. Hy is ook die voorsitter van die Namibiese Omgewing-en-natuurlewevereniging (News).
Estelle de Bruyn, redakteur van die Republikein, het gesê hulle het meer as 14 briewe ontvang waarin lesers negatief gereageer het.
Hulle het meestal gekla dat dit “jag sonder ’n doel” is, want die dier is nie vir sy vleis gejag nie, maar net vir ’n trofee.
Coetzee het gesê jagluiperds is nie bedreig in Namibië nie.
“As ons nie toegelaat word om jagluiperds en luiperds op ’n georganiseerde manier te jag, wat hulle ’n waarde gee nie, gaan hulle deur boere uitgeroei word omdat hulle problematies is.”
– Volg Nuus24 op Twitter.
- Die Burger