Mens se beste vriend hou hom ook gesond
2012-07-09 11:22
New York – Honde is nie meer nét die mense se beste vriend nie. ‘n Nuwe studie beweer dat honde babas ook teen asemhalingsprobleme en infeksies kan beskerm.
Navorsers het gevind dat Finse babas wat met ‘n hond grootword, of tot ‘n mindere mate selfs katte, minder hoes, en ook minder oorinfeksies en loopneuse kry. Hulle was ook minder geneig om antibiotika te gebruik as babas wat in ‘n troeteldier-vrye omgewing grootword.
Dr. Eija Bergroth, van die Kuopio Unversiteitshospitaal in Finland, en haar kollegas het gesê een moontlike verduideliking vir die bevindings is dat stof en allergene wat deur honde ingedra word vir babas se immuunstelsels gesond is.
Altesaam 397 babas wat tussen Sepember 2002 en Mei 2005 by die navorsers se hospitaal gebore is, was deel van die studie.
Ouers het weeklikse dagboeke ingevul vandat die kind nege weke oud was, en het so die babas se gesondheid en hulle kontak met katte en honde gemonitor.
Die navorsers het gevind dat kinders wat kontak gehad het met honde, en tot ‘n mindere mate katte, minder weke van die jaar siek was.
– Volg Nuus24 op Twitter.
- Reuters
