Meer kinders tydens resessie mishandel
2011-09-20 10:24
New York – Soos die Amerikaanse ekonomie begin krimp het, het al hoe meer mishandelde kinders met breinskade in die hospitaal beland, het ‘n studie bevind.
Voorheen het navorsers oor die verband tussen ‘n ekonomiese resessie en kindermishandeling bespiegel, maar die nuwe studie is die eerste om bewyse aan die teorie te leen.
In die verloop van drie jaar ná 2007 het die gevalle van kinders met erge breinskade as gevolg van mishandeling sowat 65% vermeerder teenoor die drie jaar in die aanloop tot 2007.
“Die kinders se pa’s en hul manlike versorgers is meestal die oortreders,” het Rachel Berger, ‘n kenner van kindermishandeling van die kinderhospitaal in Pittsburg, gesê.
“Dit is uiters selde die ma’s wat oortree,” het Berger oor haar bevindinge gesê.
Die navorsing is in die joernaal Pediatrics gepubliseer.
Terwyl Berger meen dit is onmoontlik om die bevindinge te verklaar, stel sy voor ‘n sukkelende ekonomie dwing ma’s om hul kinders by mense te los wat nie gewoond is aan kindersorg nie.
– Volg Nuus24 op Twitter.
- Reuters