Meer kinders kyk na porno-webwerwe met selfone
2011-09-26 22:50
Kaapstad – Minstens 90% van kinders tussen die ouderdom van agt en 16 het al aanlyn na pornografie gekyk, al was dit per abuis.
Die selfoonbedryf se regulerende liggaam, Waspa, sê ook dat 22% van tienermeisies en 20% van tienerseuns al onvanpaste foto’s van hulself via SMS’e gestuur het.
Baie van dié foto’s word dan ook op porno-webwerwe gepubliseer.
Volgens Russel Stromin, hoof van die gedragskomitee van Waspa, het kinders maklik toegang tot selfone met internettoegang.
Gevolglik is daar al hoe meer kinders wat onvanpaste boodskappe stuur en ontvang.
“Ons doen ‘n beroep op ouers om die nodige maatreëls in plek te stel om hul kinders te beskerm,” het Stromin gesê.
Stromin het bygevoeg dat dit nie net beteken toegang tot sekere webwerwe moet beperk word nie, maar dat ouers met hul kinders moet praat en hulle teen webwerwe van dié aard moet waarsku.
Selfoondiensverskaffers kan toegang tot sekere webwerwe blok.
Onwettige webwerwe word uit die staanspoor geblok.
“Ouers kan hul selfoondiensverskaffers skakel en versoek dat sekere webwerwe geblok word,” het Stromin gesê.
Volg Nuus24 op Twitter.
- SAPA