Meer as ‘n miljoen webtuistes in China gesluit
2011-07-14 10:44
Londen – Sowat 1.3 miljoen webtuistes het verlede jaar in China gesluit, het ‘n dinkskrum in dié land gesê.
Die Chinese Akademie vir Sosiale Wetenskappe het gesê daar was 41% minder webtuistes teen die einde van 2010 as die vorige jaar.
Chinese amptenare het hul beheer oor die internet in die afgelope jare verskerp en het in 2009 pornografiese inhoud begin uitskakel.
Navorsers by die akademie het egter gesê daar is geen verband tussen dié twee verskynsels nie en het aangedring China het ‘n “hoë vlak vryheid van spraak.”
Liu Ruisheng het gesê ten spyte van die krimpende poel webtuistes beskikbaar in China, het die hoeveelheid webblaaie op die oorblywende webtuistes in 2010 tot 60 miljard gegroei – ‘n verhoging van 79% op die vorige jaar.
“Dit beteken ons inhoud word sterker terwyl ons regulasie verskerp,” het Liu gesê.
Die Chinese regering se streng beheer oor sy land se internettoegang staan bekend as die Groot Vuurmuur van China en gewilde webtuistes soos Facebook en Twitter word daar verbied.
– Lees meer hier.
– Volg Nuus24 op Twitter.