Mediterreense dieet verbeter kans op swangerskap
2011-10-26 09:54
New York – Vroue wat ‘n Mediterreense dieet, gepak met vrugte, groente, neute en vis volg, is minder geneig om te sukkel om swanger te raak, het navorsers in Spanje bevind.
Die bevindinge voeg tot ‘n groeiende hoeveelheid literatuur by wat dié tipe dieet met gesondheidsvoordele verbind.
Die navorsers het sowat 500 vroue wat gesukkel het om swanger te raak ondersoek en hul data met hul eetgewoontes vergelyk.
Hulle het veral onderskeid getref tussen vroue wat ‘n Westerse dieet teenoor ‘n Mediterreense dieet gevolg het.
Die navorsers van die Universiteit van Navarra in Spanje het ‘n Westerse dieet as een gepak met rooivleis, volroom suiwelprodukte, verfynde graan en gaskoeldrank gedefinieer.
Slegs sowat 17% van vroue wat ‘n Mediterreense dieet streng gevolg het, het probleme gehad om swanger te raak, terwyl 26% van die vroue wat minder streng by dié gesonde dieet gebly het, gesukkel het om ma te word.
“Die Mediterreense dieet het dalk ‘n beskermende effek op insulienweerstand en diabetes,” het die navorser Estefanía Toledo gesê.
– Volg Nuus24 op Twitter.
- Reuters