Mayer praat reguit oor Yahoo! se toekoms
2013-02-13 12:21
San Francisco – Marissa Mayer, uitvoerende hoof van Yahoo!, het gesê dié maatskappy se soekenjin-vennootskap met Microsoft, wat in 2010 gesluit is, het hom nie gehelp om sy markaandeel te vergroot nie.
Daarbenewens het Yahoo! ook nie die verwagte styging in inkomste gesien wat die ooreenkoms aanvanklik aantreklik gemaak het nie.
“Een van die doelwitte van die vennootskap was dat ons saam ons markaandeel groei, pleks daarvan dat ons net met mekaar handel dryf,” het Mayer Dinsdag tydens die Goldman Sachs-tegnologiekonferensie in San Francisco gesê.
Yahoo! en Microsoft het in 2010 ‘n tien jaar lange soekenjin-vennootskap gesluit met die doel om beter met Google, die wêreld se nommereen-soekenjin, mee te ding. Die vennootskap het tot dusver egter nie aan verwagtinge voldoen nie.
“Ons moet meer geld uit die vennootskap maak, want ons weet dis moontlik en ons het al gesien hoe ons mededingers wys hoe goed dit kan werk.”
Ontleders bespiegel al lank oor die toekoms van dié ooreenkoms, wat tot dusver nie vir een van die twee partye veel voordeel ingehou het nie.
Mayer het ook aangekondig dat Yahoo! sy aantal mobiele toepassings sal verminder, en nouer met Facebook sal saamwerk.
Die 37-jarige Mayer is in Julie verlede jaar as Yahoo! se uitvoerende hoof aangestel ná die bedanking van die omstrede Scott Thompson.
Thompson het bedank oor bewerings dat hy die maatskappy bedrieg het oor sy kwalifikasies.
– Volg Nuus24 op Twitter
- Reuters
