Man oorleef dekades sonder kos
2010-05-11 12:36
Ahmadabad – ‘n 83-jarige heilige man in Indië, wat beweer hy het sewe dekades sonder kos of water oorleef, het militêre dokters wat hom vir twee weke bestudeer het, uit die veld geslaan.
Prahlad Jani het veertien dae onder konstante toesig in ‘n hospitaal in die staat Gujarat deurgebring.
‘n Span van 30 mediese dokters het hom daagliks met kringtelevisiekameras gemonitor.
Gedurende die periode het hy nie geëet, gedrink of die toilet besoek nie.
“Ons weet steeds nie hoe hy oorleef nie,” het Sudhir Shah, ‘n neuroloog, aan verslaggewers teen die einde van hul eksperiment gesê.
Daar word gehoop dat die bevindings van die studie soldate sal help om sonder kos of water klaar te kom.
Dit kan selfs ruimtevaarders help of mense se lewens red tydens natuurrampe.
Jani het sedertdien teruggekeer na sy dorp in die noorde van Gujarat, waar hy voortgaan met sy roetine om te mediteer en joga te doen.
“Indien Jani nie energie vanaf kos en water kry nie, moet hy dit vanaf ander energiebronne rondom hom kry, soos sonlig,” het Shah gesê.
- AFP