Man in publiek na gesigsoorplanting
2010-07-26 15:43
Madrid – ‘n Spaanse man wat die wêreld se eerste volle gesigsoorplanting ondergaan het, het vir die eerste keer sedert sy operasie voor televisiekameras verskyn.
Oscar, soos hy bekendstaan, het tydens die nuuskonferensie baie moeilik gepraat toe hy die mediese span wou bedank wat hom in Maart vanjaar ‘n nuwe gesig by die Barcelona-hospitaal gegee het.
Die 31-jarige het ook aan die familie van die skenker dankie gesê.
Volgens die Vall d’Hebron-hospitaal sal die man vir ongeveer ‘n jaar of 18 maande terapie moet ontvang. Daar word beraam dat hy tot 90% van die gebruik van sy gesig sal terugkry.
Die man is glo ‘n boer wat nie normaalweg kon asemhaal of op sy eie eet nie nadat hy homself sowat vyf jaar gelede per ongeluk in die gesig geskiet het.
- Volg Nuus24 op Twitter.
- AP