Man in ernstige toestand ná pofadderbyt
2010-03-03 07:31
Jana Engelbrecht
Petrusburg – ’n Man (27) wat vermoedelik gif in die veld gespuit het, is in ’n ernstige toestand in die Pelonomi-hospitaal in Bloemfontein nadat hy deur ’n pofadder gebyt is.
’n Dokter by dié hospitaal het Dinsdag gesê Gert Rossouw is in ’n stabiele toestand.
“Ons hou net die been vir infeksie dop,” het die dokter gesê.
Chris Botha, woordvoerder van Netcare 911 in die Noord-Kaap, het gesê Rossouw is Dinsdagoggend op die plaas Spitkop tussen Petrusburg en Kimberley gebyt.
“Hy het glo gif in die veld gespuit toe die pofadder hom aan sy regterbeen gebyt het.
“Boere in die omgewing het hom na die Petrusburg-kliniek gehaas.
“Netcare 911 is na die kliniek ontbied en het hard gewerk om Rossouw te stabiliseer.
“Paramedici het hom na die Netcare-Pelonomi-hospitaal gebring.”
Botha het gesê ’n pofadder is gewoonlik so 90 cm lank, maar kan tot 1,4 m groei. Dit is ’n kort slang met ’n driehoekige kop. Die slang sis en pof op as hy gepla word.
“Dié slange word gewoonlik op die grond gekry en is baie aktief nadat die son gesak het.
“Die slang se byt is giftig en beskadig jou selle. Dit veroorsaak die vernietiging van bloedvate en weefsel,” het Botha gesê.
Die byt van dié slang is gewoonlik pynlik en word gevolg deur hewige swelling en interne bloeding. Dit kan ook die verrotting van weefsel veroorsaak.
Dr. Rod Douglas van die herpetologie-afdeling van die Nasionale Museum in Bloemfontein het gesê die byt van ’n pofadder is nie gewoonlik dodelik nie.
“Slegs in 5% tot 10% van gevalle waar ’n mens deur ’n pofadder gebyt word, is die byt noodlottig.
“Die probleme wat weens die byt ontstaan, is meestal weens nalatige mediese behandeling.”
Hy het gesê die pofadder is verantwoordelik vir die giftigste byte, veral omdat hulle nie baie beweeg nie.
“Hulle lê meestal stil en ’n mens sien hulle nie.”
- Volksblad