Man agter tralies vir Facebook-belediging

2012-11-05 08:42

Kuala Lumpur – Die familie van 'n Maleisiese man wat in hegtenis geneem is nadat hy na bewering 'n sultan op Facebook beledig het, het sy reg op vryheid van spraak verdedig en geëis dat hy vrygelaat word.

Die polisie het die 27-jarige Ahmad Abdul Jalil in Kuala Lumpur in hegtenis geneem en hom laat Vrydag na die suidelike Johor-staat geneem.

Sy suster, Anisa Abdul Jalil, het gesê die staat het aan die familie gesê dat hy ondersoek word vir aanmerkings wat hy oor die sultan van Johor gemaak het.

Sy het gesê die familie weet nie presies wat hy geskryf het nie, en het gesê dat hulle bekommerd is omdat Ahmad sedert sy inhegtenisneming nog glad nie met sy familie kon kommunikeer nie.

Die polisie kon nie onmiddellik vir kommentaar bereik word nie.

Uitlatings wat Maleisiese koninklikes beledig is in dié land onwettig, en word as 'n soort openbare oproerigheid beskou.

– Volg Nuus24 op Twitter.

- SAPA