Macbeth nou 'Big Mac'
2009-10-27 02:44
Londen - Twee studente in die letterkunde was nie tevrede om bloot Shakespeare te ontleed nie en het ‘n boek met Twitter-boodskappe geskryf wat literêre werke tong-in-die-kies opsom.
Twitterature: The world’s greatest books retold through Twitter, is ‘n oneerbiedige, godslasterlike en soms 'n briljante versameling van 20 opmerkings oor die idées en temas van sowat 60 klassieke werke.
Emmett Rensin en Alexander Aciman se “tweets” kombineer die kennis van ‘n student met Engels as hoofvak met die skertstaal van tieners se sms-boodskappe.
“As jy die boeke al gelees het, is dit snaaks,” sê Rensin, wat op die vroeë ouderdom van 19 meeste van die 60 boeke klaar gelees het.
In 140 of minder karakters beskryf die paar Danté se Inferno as "I'm having a midlife crisis. Lost in the woods. Shoulda brought my iPhone."
Vir Sophecles se Oedipus the king skryf hulle: "PARTY IN THEBES!!! Nobody cares I killed that old dude, plus this woman is all over me."
Hulle het, natuurlik, Shakespeare se MacBeth die naam “BigMac” gegee.
“Ek dink MacBeth is arrogant genoeg om so iets te doen,” sê Aciman.
Die idee het egter gemengde reaksie uitgelok.
“Party mense dink dis baie slim terwyl ander dit as minagtend sien,” voeg Aciman by.
- Reuters