MWEB: Internetgebruikers sal baat

2010-03-18 13:07

Kaapstad – Terwyl MWEB se aankondiging oor onbeperkte breëband-internetpakkette meestal verwelkom word, is daar egter bekommernis oor hoe dié diens sal werk.

Heelwat Nuus24-gebruikers het die onbeperkte diens bevraagteken en gesê dat hulle gereeld deur die woord “onbeperkte toegang” uitgevang word.

Arthur Goldstuck, uitvoerende hoof van World Wide Worx, meen egter dat MWEB se nuwe pakket goed sal inpas by die Suid-Afrikaanse internetmark.

“Gestruktureerde bandwydte word outomaties beheer deur die stelsel waar die oopmaak van e-posse voorgang kry bo die aflaai van video’s of enigiets anders wat baie bandwydte gebruik,” het Goldstuck Donderdag aan Nuus24 gesê.

Volgens Goldstuck het ‘n gestruktureerde diens minder  vereistes as ‘n ongestruktureerde een omdat dit minder bandwydte gebruik. Hy het bygevoeg dat onbeperkte breëband nie gepas is tot die massas in Suid-Afrika nie.

“Ja, dit verander alles omdat daar nou geen beperkings is nie. Maar dit gaan ongelukkig nie die digitale-skeiding kan oorbrug nie. Hierdie diens fokus meer op mense wat reeds op die internet is as wat dit klem sal plaas op die massas,” het hy gesê.

Goldstuck is van mening dat die afname in internetkostes lankal reeds begin plaasvind het sedert die aankoms van die Seacom-kabel wat data goedkoper aanbied.

“Kleiner ISP’s (internetdiensverskaffers) het nog heeltyd bandwydte goedkoper probeer maak vir gebruikers met die hulp van spesiale aanbiedings,  maar hulle kon dit nie onderhou nie. Die groter ISP’s kan dit bekostig om hulle produkte goedkoper te maak. So die grootste verandering is eintlik vir die internetgebruiker eerder as die verskaffer,” het Goldstuck gesê.

Hy is van mening dat MWEB se mededingers nou geforseer sal word om dieselfde stappe te neem.

“O, hulle sal moet reageer. Telkom sal moet reageer. Hulle sal moontlik eers sê hulle neem nie deel aan prys-oorloë nie en dan sal hulle waarskynlik hul eie pakket bekendstel,” het hy gesê.

– Nuus24