MRK bekommerd oor Facebook, Twitter

2011-08-30 19:57

Johannesburg – Die Menseregtekommissie het kommer oor die ongereguleerde aard van sosiale netwerke soos Facebook en Twitter uitgespreek.

Lawrence Mushwana, die voorsitter van die kommissie, het gesê gebruikers van die sosiale netwerke maak hulle skuldig aan haatspraak en ander menseregteskendings, berig RSG.

Mushwana het kommer uitgespreek kort ná die Valke 'n ondersoek na 'n foto van 'n gewapende man wat poseer oor die liggaam van 'n kind begin het.

Dié foto het opspraak gewek nadat die Sunday Times dit Sondag gepubliseer het.

Sedertdien het dit bekend geword die foto het reeds vier jaar gelede op Facebook die ronde gedoen.

Die Wes-Kaapse polisie het gesê 'n man het reeds in 2007 getuig dat hy die kind betaal het om só vir die foto te poseer.

– RSG

– Volg Nuus24 op Twitter.