Los wiskunde-probleem só op
2012-11-20 08:16
Johannesburg – ‘n Gratis, opvoedkundige aanlyn-program wat daarop gemik is om die gehalte van wiskunde-en wetenskaponderwys in die land te verbeter, is deur 'n plaaslike maatskappy beskikbaar gestel.
Die SAS Institute, 'n sagtewaremaatskappy, het Maandag in ‘n verklaring gesê sy Curriculum Pathways-program sal poog om die gehalte van wetenskaponderwys in Suid-Afrika aansienlik te verbeter.
“Die Wêreld-Ekonomiese Forum het sy jaarverslag oor finansiële ontwikkeling gepubliseer; dié verslag plaas Suid-Afrika 62ste uit 62 lande wat die gehalte van wetenskaponderwys betref,” het SAS in ‘n verklaring gesê.
“Die departement van basiese onderwys is dringend op soek na oplossings vir die probleem. Hierdie program is ‘n broodnodige ingryping.”
Riad Gydien, SAS se adjunk-hoof vir die Midde-Ooste en Afrika, sê die program sal gratis in Suid-Afrika beskikbaar gestel word.
“In Suid-Afrika, waar daar beduidende probleme met die onderwysstelsel is, veral met wiskunde en wetenskap, bied SAS Curriculum Pathways ‘n oplossing.”
Die maatskappy het R663 miljoen aan die ontwikkeling van die program spandeer.
Die program kom in twee weergawes, een vir onderwysers en een vir leerders.
– Volg Nuus24 op Twitter
- SAPA
