'Lewensgevaarlike' fout op iPhone-kaarttoepassing
2012-12-10 08:08
Video - Apple stel iPhone 5 bekend
Apple het sy nuwe iPhone 5 bekendgestel by 'n geleentheid in San Francisco. Hier is alles wat jy wil weet oor dié gewilde slimfoon.
KYK
Sydney – Die Australiese polisie het motoriste Maandag gewaarsku om versigtig te wees wanneer hulle die kaarttoepassing op Apple se iPhone gebruik, ná hulle verskeie mense moes red wat in die Australiese wildernis beland het.
Die Victoria-staatspolisie het gesê bestuurders is die afgelope paar weke "van die gewone pad af" gestuur wanneer hulle na die dorp Mildura probeer ry. Motoriste word na die middel van 'n nasionale park gelei.
"Die polisie is uiters bekommerd want daar is geen waterbron in die park nie en temperature kan so hoog as 46 grade Celsius wees, wat hierdie 'n lewensgevaarlike saak maak," het die polisie in 'n verklaring gesê.
Owerhede het gesê toetse met die kaartstelsel het bevestig dat dit Mildura, ongeveer 500 km noordwes van Melbourne, in die hartjie van die Murray Sunset- nasionale park plaas.
Dis ongeveer 70 km van waar die dorp eintlik is.
Ses motoriste is die laaste paar weke in die park gered ná hulle aanwysings op hulle Apple iPhones gevolg het. Sommige van dié motoriste was tot 24 uur sonder kos of water.
"As dit 'n dag van 45 grade is, kan iemand sterf," het Simon Clemence, Mildura se plaaslike bevelvoerder, aan die uitsaaier ABC gesê.
– Volg Nuus24 op Twitter.
- Sapa - AFP
