Lewe moontlik op ‘groot dele’ van Mars

2011-12-14 07:30

Sydney – Australiese wetenskaplikes wat toestande op Mars nageboots het, meen “groot dele” van die planeet kan lewe op die oppervlak onderhou.

Die navorsingspan van Charley Lineweaver van die Australiese Nasionale Universiteit het temperatuur- en lugdrukmodelle op aarde vergelyk met toestande op Mars om vas te stel hoeveel van die buurplaneet leefbaar kan wees vir organismes soos wat op die aarde voorkom.

Terwyl net 1% van die aarde se algehele volume (van die kern tot die boonste atmosfeer) deur lewe beset word, wys die Australiërs se navorsing dat 3% van Mars se volume lewe kan onderhou, hoewel groten-deels ondergronds.

Hoewel ys gevind is op Mars se pole, beteken die lae lugdruk op die oppervlak dat water nie as vloeistof kan bestaan nie en op die oppervlak sal verdamp. Ondergronds is dit egter ’n perd van ’n ander kleur en is die toestande wel gunstig.

Die gewig van die grond help ook dat voldoende druk vir vloeibare water voorkom.

Dit sal ook warm genoeg wees op sekere dieptes vir bakterieë en ander mikro-organismes om te floreer danksy hitte wat die planeet se kern afgee.

Die gemiddelde oppervlaktemperatuur op Mars is 63 grade onder die vriespunt.

Die Lineweaver-span se navorsing is vandeesweek in die wetenskapjoernaal Astrobiology gepubliseer. 

– Volg Nuus24 op Twitter

- Sapa - AFP