Lesers dok nou op om koerant aanlyn te lees
2010-07-03 06:46
Volksblad
Johannesburg – Lesers wat die Britse koerante The Times en The Sunday Times aanlyn wil lees, moet van gister af £1 (sowat R11,74) vir ’n dag se toegang of £2 per week opdok.
The Times is die eerste hoofstroom-nie-spesialis-dagblad in Brittanje wat dit doen.
Die Wall Street Journal – wat net soos dié koerante ook aan Rupert Murdoch behoort – is tans die enigste groot koerant in Amerika wat lesers geld vir volle aanlyntoegang vra.
DieNew York Times het in Januarie aangekondig hy gaan vroeg in 2011 begin geld vra vir aanlyn-inhoud.
Volgens William Bird, uitvoerende direkteur van Media Monitoring Africa, lees betreklik min Suid-Afrikaners tans nuus aanlyn omdat min mense hier toegang tot die internet het.
Bird reken om in dié stadium geld vir algemene nuus te vra, sal nie werk nie. “Daar is net te veel nuusbronne, tensy jy op ’n nismark fokus.”
Soos wat meer mense internettoegang kry – byvoorbeeld op hul selfone – sal koerante dalk binne die volgende vyf jaar daarvoor begin geld vra, het hy bygevoeg.
Volgens hom kan ’n gemengde model, soos by Independent Newspapers waar lesers vir sekere berigte of artikels betaal, werk.
Prof. Anton Harber, Caxton-professor in joernalistiek aan die Universiteit van die Witwatersrand, het gesê dit is onafwendbaar dat Suid-Afrikaners “op die lange duur vir nuus of inligting gaan moet betaal”.
“Die kwessie is hóé ons gaan betaal,” het hy gesê. “Daar is talle modelle: Op sekere webwerwe betaal jy vir alle inligting, op ander om diepte-artikels te lees, op ander vir toegang tot argiewe en op party sal jy per berig of artikel betaal.”
Volgens Harber kan koerante nie soos in die verlede net deur advertensies oorleef nie, omdat adverteerders nou soveel meer keuses het oor waar om te adverteer.
Sou koerante geld vir webwerftoegang vra, sal die gehalte van nuus baie goed moet wees. “Mense gaan nie betaal as hulle nie waarde sien nie,” het Harber gesê.
Volg Nuus24 op Twitter.
- Volksblad