Lenovo nou grootste in rekenaarmark

2012-11-08 09:07

Hongkong – Die Chinese rekenaarvervaardiger Lenovo het Donderdag aangekondig dat hy nou amptelik die grootste vervaardiger van persoonlike rekenaars en skootrekenaars ter wêreld is.

Die maatskappy het boonop 'n styging van 13% in sy wins vir die tweede kwartaal aangekondig.

"Lenovo het in die tweede finansiële kwartaal die wêreld se nommer-een-vervaardiger van persoonlike en skootrekenaars geword en bly die grootste rekenaarmaatskappy in ontluikende markte, insluitend China," het die maatskappy aan die Hongkongse aandelebeurs gesê.

Lenovo se markaandeel het in die tydperk van Julie tot September 'n hoogtepunt van 15,6% bereik, wat hom 'n voorsprong van 0,2% bo Hewlett-Packard gee.

Die maatskappy het ten spyte van 'n afname in die wêreldwye vraag die laaste paar maande beter presteer as die VSA se Hewlett-Packard en Dell.

Die verkope van persoonlike rekenaars neem wêreldwyd af omdat meer mense tot die internet toegang verkry deur toestelle soos tabletrekenaars en slimfone.

– Volg Nuus24 op Twitter.

- AFP