Lang wag vir forensiese uitslae in SA
2012-04-04 19:02
Pretoria – Lang vertragings in die uitreiking van forensiese toetsuitslae beïnvloed die lewens van talle Suid-Afrikaners nadelig, het Aaron Motsoaledi, minister van gesondheid, Woensdag gesê.
Die regering hoop om die situasie om te keer deur volgehoue belegging in die studie van die forensiese chemie en die vestiging van 'n vierde forensiese laboratorium in die land.
Motsoaledi, wat 'n internskapprogram tussen die departement van gesondheid en die Universiteit van Pretoria bekendgestel het, het gesê dié projek kan die massiewe agterstand by forensiese laboratoriums help oplos.
"Met hierdie vennootskap hoop en glo ons dat die lewens van Suid-Afrikaners sal verander," het hy gesê.
"Hierdie projek sal doeltreffendheid en terugvoertye verbeter danksy die spoed waarteen hangende sake gefinaliseer sal word."
Die sewe maande lange program, met 'n begroting van R12 miljoen om onderrig en akkommodasie op die kampus te dek, maak voorsiening vir die opleiding van 70 werklose mense in die veld van chemie, biochemie en chemiese ingenieurswese, wat van al die provinsies kom.
"Ons plan is om die studente by hierdie universiteit vaardighede te leer en om hulle te ontwikkel, en om hulle dan later aan ons laboratoriums bloot te stel," het Motsoaledi gesê.
Hy het gesê die vierde forensiese laboratorium sal in KwaZulu-Natal gevestig word, om die bestaande laboratoriums in Kaapstad, Johannesburg en Pretoria te ondersteun.
– Volg Nuus24 op Twitter.
- SAPA
