Kuberseks-boewe teiken veral dié tieners
2011-05-13 07:08
Johannesburg – Kuberseks-misdadigers se teikens is meestal tieners tussen 16 en 18 jaar.
’n Studie deur Unisa se buro vir marknavorsing het getoon die meeste voorvalle van aanlyn-viktimisering – waar mense aan seks op die internet of op ’n selfoon blootgestel word – kom by tieners tussen 16 en 18 jaar voor.
Dié studie is verlede jaar op versoek van die Film- en Publikasieraad gedoen.
2 832 mense tussen 12 jaar en 25 jaar het daaraan deelgeneem.
Die resultate het gewys 16,95% van die deelnemers het al boodskappe of skakels oopgemaak van foto’s van kaal mense óf waar mense seks het.
15,82% het al ’n webwerf met sulke foto’s gevind, terwyl 17,79% al e-posse of boodskappe ontvang het met advertensies of skakels vir webwerwe met ’n X-gradering.
Byna 10% is al, terwyl hulle op die web besig was, gevra om ’n seksuele daad te verrig, terwyl bykans 6% gevra of aangemoedig is om van die huis af weg te hardloop.
21,46% van die deelnemers is gevra om oor seks te praat, maar het geweier.
“Aanlyn-viktimisering van die jeug neem verskeie vorme aan wat seksuele versoeke, seksuele teistering en blootstelling aan pornografiese materiaal insluit,” lui die studie.
“Die vernaamste vorm wat aanlyn-viktimisering onder jongmense aanneem, is wanneer ’n derde party, bekend of onbekend, met hulle seksuele praatjies wil maak terwyl hulle op die web is.
“Opwip-advertensies vir webwerwe met ’n X-gradering dra grootliks by tot die aanlyn-viktimisering van die jeug.”
Volgens die studie is mans en vroue ewe vatbaar vir aanlyn-viktimisering en is kinders so jonk as 12 jaar al daaraan blootgestel.
Daarby loop die jeug, hetsy hulle in die stad, platteland of in landelike gebiede woon, almal die gevaar om slagoffers van kuberseks-misdadigers te word.
Slagoffers beleef gevoelens van ’n gebrek aan respek, woede, angs en ongemak.
Hulle is gewoonlik alleen wanneer hulle dié gevoelens ervaar. Hulle benodig dringende steun om hul emosies te verwerk, lui die studie.
“Meer moet gedoen word om kinders teen aanlyn-viktimisering te beskerm, want dit veroorsaak langtermynskade.”
Volg Nuus24 op Twitter
- Beeld