Kuberkrakers teiken Burger King

2013-02-19 12:19

New York – Die amptelike Twitter-blad van die Amerikaans-gebaseerde kitskosgroep Burger King was tydelik opgeskort ná dit deur kuberkrakers aangeval is.

Die maatskappy se profielfoto op Twitter is Dinsdag verander na die kitskosgroep McDonald's se kenteken.

‘n Twiet is toe van die blad af gestuur wat sê: “Sopas aan McDonald’s verkoop omdat die whopper (‘n Burger King-produk) misluk het.”

Die agtergrond van die blad is ook verander na ‘n beeld van McDonald's se nuwe Fish McBites-produk.

Daaropvolgende boodskappe van die blad af het rassistiese aanmerkings, verwysings na dwelmgebruik en ander kragwoorde ingesluit.

Burger King het die blad in 'n stadium opgeskort.

“Dit het onder ons aandag gekom dat die Twitter-blad vir Burger King deur kuberkrakers aangeval is,” het ‘n woordvoerder vir Burger King in ‘n verklaring gesê.

“Ons werk nou saam met ons administrateurs om die blad op te skort totdat ons in staat is om ons oorspronlike plasings te kan wys.”

“Ons vra om verskoning aan ons volgelinge wat foutiewe twiets oor ander lede van ons bedryf en ander bykomende onvanpaste onderwerpe ontvang het.

McDonald's het ook op die kuber-aanval gereageer.

“Ons het simpatie met ons @BurgerKing-vriende. Wees verseker dat ons niks met die aanval te doen gehad het nie,” het McDonald's op Twitter gesê.

Niemand het nog verantwoordelikheid vir die aanval aanvaar nie. Die blad was teen vroegmiddag weer beskikbaar.

– Volg Nuus24 op Twitter
 

- Reuters