Kuberkrakers steel Yahoo-wagwoorde

2012-07-13 10:30

Die Yahoo Contributor Netwerk was deur kuberkrakers geïnfiltreer.

Londen – Ongeveer 450 000 Yahoo-gebruikers se e-posadresse en wagwoorde het in die verkeerde hande beland as gevolg ’n sekuriteitsbreuk, het die maatskappy Donderdag bevestig.

Slegs ’n klein fraksie van die wagwoorde is egter nog geldig, het Yahoo bygevoeg.

Die maatskappy het in ’n verklaring gesê dat een van die "ouer lêers" van die Yahoo Contributor Network op Woensdag gekraak is. 

Die Yahoo Contributor Network is 'n platform wat Yahoo-gebruikers in staat stel om hul inhoud te publiseer in menige formate soos teks, video, klank en beelde.

Die gesteelde e-posadresse en wagwoorde was hoofsaaklik van Yahoo se eie e-posdiens, maar ander maatskappye word ook daardeur geraak. 

“Ons wil alle gebruikers om verskoning vra,” het die maatskappy in ’n verklaring gesê.

Webwerwe wat in tegnologie spesialiseer, soos CNET, Ars Technica en Mashable, was in staat om die kuberkrakers wat verantwoordelik is vir die aanval te identifiseer as ’n onbekende maatskappy genaamd D33D Company.

– Volg Nuus24 op Twitter.