Kuberkraker kry 20 jaar tronkstraf
2010-03-26 12:51
Boston – Een van die wêreld se mees berugte kuberkrakers is met 20 jaar tronkstraf gevonnis nadat hy skuld erken het op kuber-misdade.
Albert Gonzalez, ‘n 28-jarige man van Miami, het gehelp om ‘n span te lei wat maatskappye se rekeninge gekraak het en meer as 40 miljoen kredietkaartnommers gesteel het.
Dit was die swaarste vonnis wat nog ooit vir ‘n rekenaarmisdaad in die VSA uitgespreek is.
Volgens Stephen Heymann, ‘n advokaat, het Gonzalez en sy makkers sowat $200 miljoen (R1,5 miljard) se skade aan besighede gerig.
Heymann sê dis onmoontlik om vas te stel hoeveel geld gesteel is.
“Hulle het letterlik na OTM's gegaan en bondels geld uit hul slagoffers se rekeninge gesteel,” het Heymann in die hof gesê.
Gonzalez, wat aanvanklik met 25 jaar gestraf sou gewees het, het die regter om genade gevra.
Hy het vertel hoe hy van kleins af aan rekenaars verslaaf was, alkohol en onwettige dwelms misbruik het en aan simptome van Asperger-sindroom, ‘n vorm van outisme, gely het.
Gonzalez, wat $1 miljoen (sowat R7,4 miljoen) se kontant in sy ouers se tuin begrawe het, het gesê dat sy misdade buite beheer geraak het aangesien hy nie sy “nuuskierigheid en verslawing” kon keer nie.
Sy tyd agter tralies kan dalk verleng word aangesien ‘n ander regter hom Vrydag sal vonnis vir ‘n twee stel klagtes teen hom.
- Reuters