Kuberaanval gee PayPal gevoelige slag
2011-07-28 08:03
Johannesburg – ’n Boikot deur die aanlyn-terreurgroep Anonymous op die Amerikaanse internetbetaaldiens PayPal het Woensdag veroorsaak dat eBay se aandeelprys só gedaal het dat sy markapitalisasie met byna $1 miljard (R6,6 miljard) getuimel het.
PayPal behoort aan eBay.
Anonymous het Woensdagoggend omstreeks 07:00 Suid-Afrikaanse tyd die boikot teen PayPal begin en het mense gevra om hul PayPal-rekeninge te sluit.
Hulle is ongelukkig omdat PayPal vroeër nie meer geld wat ondersteuners aan Wikileaks geskenk het, oorbetaal het nie.
Verder is hulle woedend omdat die Amerikaanse federale speurdiens (FBI) een van hul lede, Mercedes Haefer, ’n 20-jarige student van Las Vegas, gearresteer het omdat sy PayPal na bewering met ’n DDOS-aanval (distributed denial of service) geteiken het.
Sy kan 15 jaar tronkstraf en ’n boete van $500 000 (R3,3 miljoen) kry as sy skuldig bevind word.
Anonymous het Woensdagoggend in ’n verklaring PayPal as “korrup” en “gierig” beskryf.
Luidens die verklaring is ’n DDOS-aanval nie skadelik nie.
Die FBI is volgens Anonymous slaggereed om dié wat betrokke is by “etiese, moderne kuberoperasies”, te arresteer en te dreig.
Die groep sê hulle is “gewalg deur dié onregte en sal nie toelaat dat ons deur korporasies of regerings vertrap word nie”.
Anonymous het Woensdagaand op Twitter beweer meer as 35 000 mense oor die wêreld heen het hul PayPal-rekeninge gesluit.
Baie het dit ter ondersteuning van die boikot gedoen, terwyl ander bang was hul kredietkaartbesonderhede kan misbruik word.
1 200 PayPal-kliënte het na raming hul rekeninge in die eerste vyf uur van die boikot gesluit.
Anonymous het ook op Twitter gesinspeel dat hulle by PayPal se stelsels gaan inbreek en dat “’n verrassing moontlik later op eBay wag”.
As hulle ’n kuberaanval op PayPal begin, sal dit waarskynlik met ’n DDOS wees. Daarna sal ’n inligtingskending (data breach) waarskynlik volg en die vrystelling van inligting aan die publiek met die moontlikheid dat inligtingdiewe (data scroungers) wagwoorde na rekeninge kry en dit teen gebruikers gebruik.
– Volg Nuus24 op Twitter.
- Die Burger