Kruiemedisyne moet geregistreer word
2011-08-15 08:20
Johannesburg – Vervaardigers en verspreiders van kruiemedisyne, homeopatiese middels en ander alternatiewe en aanvullende medisyne (AAM) sal voortaan hul middels by die Suid-Afrikaanse Medisynebeheerraad (MBR) moet registreer.
Hulle sal moet bewys hul middels is veilig en doeltreffend voordat hulle dit kan verkoop.
Dít word voorgestel in riglyne vir AAM-registrasie wat pas in die Staatskoerant gepubliseer is.
Dit word voorgestel dat AAM ingevolge die Wet op Medisyne en Verwante Stowwe in ’n nuwe kategorie val.
Volgens die voorgestelde riglyne sal alle vervaardigers van AAM verplig word om te voldoen aan sogenaamde Good
Manufacturing Practice (GMP).
Dit sal onwettig wees om swak verpakte produkte sonder vervaldatums of volledige inligting oor die inhoud en herkoms te verkoop.
Indien toetse toon die produkte is van swak gehalte, sal die MBR kan eis dat dit aan die mark onttrek en vernietig word.
Verspreiders sal nie enige kruiemiddel kan smous nie.
Die kategorieë en beweerde gesondheidsgebruike moet ten minste deur sekere betroubare literêre bronne of kliniese proefnemings bevestig wees.
Kruiemiddels, tradisionele Chinese en Ayurvediese medisyne, homeopatiese middels en aromaterapie word in die dokument genoem, maar nie tradisionele Afrika-medisyne nie.
Die name en adresse van alle partye wat by die vervaardiging betrokke is, sal deel van die registrasie-aansoek moet wees.
Die publiek kan tot 22 September op die riglyne kommentaar lewer.
– Volg Nuus24 op Twitter.
- Die Burger