Krokodil buite gevaar
2011-11-11 07:01
George – Liz, ’n drie meter lange krokodil by ’n wildbesigtigingsentrum op Oudtshoorn, is buite gevaar nadat ’n Coke-blik Dinsdag uit haar maag verwyder is.
Dié 25 jaar oue krokodil het verlede Donderdag die blikkie ingesluk nadat ’n besoeker dit vermoedelik in haar kamp gegooi het, het Tammy Moult, woordvoerder van die Cango Wildlife Ranch, Donderdag gesê.
“Die krokodil het die blikkie ingesluk voordat iemand dit kon verwyder. Sy is goed dopgehou en hoewel sy geen tekens van ongesteldheid getoon het nie, is daar besluit om haar as ’n voorsorgmaatreël na ’n plaaslike veearts, dr. Glen Carlisle, te bring.”
Die dam waar sy bly, is eers leeggetap en daarna is sy verdoof en agterop ’n bakkie na Carlisle se spreekkamer vervoer. Hier het sy agt uur deurgebring.
In die spreekkamer is die krokodil weer verdoof en haar bek oopgemaak en gestut. Carlisle, wat op die grond moes lê, het haar maag met behulp van ’n endoskoop – ’n lang buis met ’n kamera en lig daaraan – ondersoek.
Volgens Moult was die blikkie tussen hompe vleis en water in die maag sigbaar. Aanvanklik is probeer om die blikkie met behulp van ’n haak uit te trek, maar dit was tevergeefs. Daar is toe besluit om die water uit die krokodil se maag te pomp, ’n sny van 12 cm in die linkersy te maak en die blikkie uit te haal.
Nadat die sny toegewerk is, is die krokodil terug na die wildplaas gebring. Sy word tans alleen aangehou en is buite gevaar.
Die personeel van die wildplaas beoog om die blikkie in bewusmakingsveldtogte te gebruik, het Moult gesê.
“Ons wil voorkom dat so iets weer gebeur.
“Iemand se onverantwoordelike optrede het onnodige trauma vir die krokodil veroorsaak en dit het ’n lang en duur operasie tot gevolg gehad.”
– Volg Nuus24 op Twitter
- Die Burger