Mosselbaai gedwing om seewater te ontsout
2010-05-25 09:05
George - Seewater gaan vir menslike gebruik in Mosselbaai ontsout word om dié gewilde Suid-Kaapse kusdorp se waterkrisis die hoof te bied.
Op ’n droogte-indaba wat Maandag hier gehou is, het dit aan die lig gekom dat die dorp net genoeg skoon water tot die eerste week van Augustus het as dit nie reën nie.
Die Wolwedansdam, Mosselbaai se belangrikste waterbron, is tans 23% vol.
PetroSA is egter op die helfte van dié water geregtig. Tans daal die vlak van die dam met sowat 0,8% per week. Die munisipaliteit gebruik 12MF per dag, terwyl PetroSA 15MF gebruik.
Gerhard Otto, hoof van rampbestuur in die Eden-distriksmunisipaliteit, het gesê die situasie in Mosselbaai is kritiek.
Die planne vir ’n ontsoutingsaanleg met ’n aanvanklike vermoë om 10MF vars water te verskaf, is gereed. PetroSA het onderneem om geldelik tot dié aanleg by te dra. Dit sal uiteindelik 15MF water per dag kan ontsout. Die koste van die projek beloop tussen R130 miljoen en R140 miljoen en dit sal in November in bedryf wees.
Die plan is om dit naby Voorbaai te vestig. Pomptoerusting sal in die diepsee geplaas word om die water na Mosselbaai te pomp. Dit is duurder, maar die water wat verskaf word, is van ’n hoër gehalte.
Otto het gesê dit is moontlik dat Mosselbaai uiteindelik die George-munisipaliteit vir waterhulp kan vra. Die politieke leiers sal daaroor moet besluit.
Volgens Otto gaan huishoudelike waterverbruik van 20kF per maand tot 15kF of selfs 10 kFper maand per beperk word.
Daar is drie hoofverbruikers van water in die Mosselbaai-omgewing: landbou, die munisipaliteit en PetroSA. Die landboubedryf is versoek om sy onttrekkings te meet sodat gesien kan word hoeveel water die boere uit die Wolwedansdam pomp.
PetroSA is versoek om vas te stel hoe hy sy waterverbruik kan verminder.
–
Die Burger