Kos, toerusting op pad na ruimtestasie
2012-10-08 12:26
Fotogalery - Vrag na Internasionale Ruimtestasie gestuur
klik op klein foto bo om groter prentjie te sien
Washington – 'n Vragkapsule met voedsel en toerusting was teen Maandagoggend vinnig op pad na die Internasionale Ruimtestasie (IRS) ná 'n suksesvolle lansering laat Sondag by Cape Canaveral.
Die kapsule, genaamd Dragon, het sy wentelbaan bereik en twee vlerkagtige antennas is ontplooi.
"Dis 'n fantastiese aand. Dragon is in 'n perfekte wentelbaan. Die sonkragantennas is ontplooi en dit is op pad na die stasie," het Gwynne Shotwell, hoof van die maatskappy SpaceX, aan verslaggewers gesê.
"Dis net fantasties."
Sy het later opgemerk dat daar "'n abnormaliteit is by Enjin Een," maar sy het bygevoeg dat die kapsule sy bestemming kan bereik al raak 'n enjin onklaar.
Die sending – die eerste van 12 beplande lanserings in die Amerikaanse maatskappy se kontrak van $1.6 miljard (sowat R14 miljard) met Nasa – is 'n groot mylpaal vir die VSA se pogings om die ruimtereis-bedryf te privatiseer.
"Ons oorhandig ons vervoer na die Internasionale Ruimtestasie aan die private sektor sodat Nasa kan fokus op wat ons die beste doen: verkenning tot selfs verder in ons sonnestelsel, met sendings na 'n asteroïde en Mars op die horison," het Charles Bolden van Nasa by 'n mediakonferensie gesê.
– Volg Nuus24 op Twitter.
- AFP
