Koop een tier, kry een verniet
2010-01-21 13:13
Jakarta – Die Indonesiese regering gaan probeer om die Soematraanse tier van uitsterwing te red deur mense toe te laat om die diere, wat in aanhouding gebore word, as troeteldiere te koop teen sowat $100 000 (R750 000) per paar.
Owerhede sê die plan kan hierdie jaar al geïmplementeer word, ten spyte van omgewingsaktiviste wat hul kommer oor die nuwe beleid uitgespreek het.
Die aktiviste meen dit sal meer konstruktief wees om te fokus op die bewaring van die bedreigde tiere se natuurlike habitat.
"Ons verkoop of verhuur nie tiere nie. Ons gee mense bloot die geleentheid om na hulle om te sien," het die hoof van bewaring by die Indonesiese ministerie van bosbou, Darori, gesê.
"Hierdie mense sal aan sekere vereistes moet voldoen. Die tiere sal steeds aan die staat behoort."
Hy het gesê belangstellendes sal 'n biljoen rupiah (oftewel R750 000) as deposito moet neersit vir twee tiere, wat hy 'n "waarborg vir bewaring" genoem het.
Die minimum grootte vir die area waarin die paar gehou moet word, sal omtrent 60 vierkante meter wees, alhoewel iets wat rofweg die grootte van drie sokkervelde is, die beste sal wees.
Die diere se gesondheid sal deur spesialiste gemonitor word, en mishandeling sal met boetes of tronkstraf gestraf word.
Greenpeace-Suidoos-Asië-aktivis Bustar Maitar het gesê die regering mag dalk nie daarvan hou om die plan as die verkoop van 'n bedreigde spesie te bestempel nie, maar dit is in der waarheid wat die beleid goedkeur.
–Sapa-AFP