Kommer oor uitkoms van klimaatberaad

2012-12-03 16:44

Doha – Verskillende lande is erg verdeeld oor sleutelkwessies by die Verenigde Nasies se beraad oor klimaatsverandering in Doha, Katar.

Dié verdeeldheid kom te midde toenemende kommer oor aardverwarming en die gepaardgaande klimaatsverandering.

Waarnemers het gesê dit wil voorkom of lande ná ses dae van intense onderhandelings steeds nie ‘n ooreenkoms kan bereik om die Kioto-protokol te verleng nie. Dié protokol beperk die vrystel van kweekhuisgasse.

Derdewêreldlande by die beraad dring daarop aan dat die Weste uitlatings strenger beperk. Hulle vra ook meer geldelike steun om by klimaatsverandering te kan aanpas.

“Ons begin die finale week van onderhandelinge in Doha met die wete dat die tyd min raak om die verlies van menselewens en ander rampe in ons gebied te verhoed,” het 'n verklaring deur die Alliansie van Klein Eilandnasies, 'n groep wat 43 eilande verteenwoordig, gelui.

‘n Nuwe studie wat Sondag gepubliseer is, het aangedui dat die aarde se temperatuur teen 2100 met vyf grade Celsius kan styg. Dit is meer as dubbel die syfer wat wetenskaplikes in die verlede voorspel het.

– Volg Nuus24 op Twitter
 

- Sapa - AFP