Kommer oor aardverwarming neem toe
2012-08-28 22:55
Washington – 'n Groter persentasie van die ysplate in die Arktiese oseaan het vanjaar gesmelt as ooit tevore, wat daarop dui dat voorspellings oor klimaatsverandering dalk vinniger bewaarheid kan word as wat wetenskaplikes gedink het.
Data van die VSA se Nasionale Sneeu- en Ysdatasentrum wys ook dat die ys selfs nog verder kan smelt omdat die somer nog 'n paar weke kan voortduur.
Die sentrum het in ‘n verklaring gesê dat die gesmelte ys ‘n “teken is van die langtermyn-gevare van klimaatsverandering.”
Ys bedek nou sowat 4,19 miljoen vierkante kilometer van die Arktiese oseaan, sowat 70 000 vierkante kilometer minder as in 2007.
Michael E. Mann, een van die hoofskrywers van ‘n VN-verslag in 2001 oor klimaatsverandering, sê die nuutste data wys dat wetenskaplikes wat voorheen gekritiseer is weens hul opspraakwekkende stellings oor klimaatsverandering, “dalk selfs ‘n bietjie teruggehou het”.
“Ek dink, ongelukkig, dat hierdie ‘n voorbeeld is wat die ergste prentjie moontlik skets,” het Mann, direkteur van die Penn State-universiteit se wetenskapsentrum, gesê.
– Volg Nuus24 op Twitter.
- Sapa - AFP
