Koffie, koeldrank lei nie tot kolonkanker
2010-05-10 16:48
Boston – Dit is dalk ’n wolhaarstorie dat groot hoeveelhede koffie of versoete gaskoeldrank ’n rol speel in jou kanse om kolonkanker te kry.
Só het navorsers bevind in ’n studie wat in die Journal of the National Cancer Institute gepubliseer is.
Vorige studies het bevind koffie en tee kan jou kanse om kanker te kry verhoog of verlaag.
Versoete gaskoeldrank lei weer tot vetsug en risikofaktore vir kanker.
Dr. Xuehong Zhang en sy kollegas by die Harvard-skool vir openbare gesondheid het data vergelyk in 13 studies wat die laaste jare in Amerika en Europa gedoen is.
Hulle wou kyk of daar waarheid steek in gerugte dat dit wat jy drink jou kanker kan gee of jou daarteen beskerm.
Altesame 5604 van die 731441 mense wat aan die 13 studies deelgeneem het, het kolonkanker gekry.
Diegene wat groot volumes koffie (meer as ses koppies per dag) gedrink het, het nie ’n groter of kleiner kans gehad om kanker te kry as die res van die deelnemers nie.
Hulle kon ook geen verband vind tussen die drink van gaskoeldrank met baie suiker en dié soort kanker nie.
Die navorsers wys wel daarop dat min van die deelnemers baie gaskoeldrank gedrink het en die toetsresultate dalk statisties minder betroubaar kan wees.
Die groep wat meer as agt koppies tee (swart- nie kruietee) gedrink het, het wel ’n verhoogde kans gehad vir kolonkanker, maar dit kon ’n toevallige resultaat gewees het, ook omdat min deelnemers so baie tee gedrink het.
– EurekAlert!