Koffie kan kans vir beroerte in vroue verminder
2011-03-11 13:46
Dallas – Vroue wat ‘n daaglikse koppie boeretroos geniet sal van hierdie brokkie nuus hou: koffie kan die risiko van ‘n beroerte verminder.
Vroue in ‘n Sweedse studie wat minstens een koppie koffie op ‘n dag gedrink het, het ‘n 22% tot 25% verminderde kans vir ‘n beroerte gehad, in vergelyking met diegene wat minder of geen koffie drink.
“Koffiedrinkers moet bly wees,” het dr. Sharonne N. Hayes, ‘n kardioloog by Mayo-kliniek in Rochester, Minnesota, gesê.
“Daar word baie gesê koffie is potensieel sleg vir jou hart. Daar was nog nie regtig enige studies wat oortuigend bewys het dat koffie sleg is vir jou nie.”
Nietemin het Hayes bygevoeg dat die studie nie diegene wat nie koffie drink na die naaste koffiewinkel moet laat haas nie.
Die studie bewys nie dat koffie die risiko vir ‘n beroerte verminder nie, net dat diegene wat koffie drink geneig is om ‘n laer risiko vir beroertes te hê.
Hierdie tipes epidemiologiese studies is noodsaaklik, maar hulle bewys nie die oorsaak nie,” het dr. David S. Seres, direkteur van mediese voeding by Columbia Universiteit se kollege vir dokters in New York, gesê.
Die bevindinge is Donderdag in die American Heart Association se aanlyn-joernaal Stroke gepubliseer.
Volg Nuus24 op Twitter
- Sapa - AP