Klimaatsverandering g'n grap, sê Obama

2012-09-07 07:25

Charlotte, Noord-Carolina – Pres. Barack Obama van die VSA het Donderdag benadruk dat klimaatsvernadering nie 'n bedrogspul is nie, en het hom opnuut verbind tot die stryd teen aardverwarming.

Dié belofte volg ná die presidentskandidaat Mitt Romney by die Republikeinse Konvensie in Tampa, Florida met Obama die spot gedryf het omdat hy na bewering meer omgee vir die omgewing as sy land se mense.

"My plan sal voortgaan om besoedeling weens koolstofdioksied wat ons planeet warmer maak, te verminder, want klimaatsverandering is nie 'n bedrogpul nie," het hy in 'n toespraak by die Demokrate se Nasionale Konvensie in Charlotte, Noord-Carolina, gesê.

"Meer droogtes en vloede en wegholbrande is nie 'n grap nie," het hy gesê. "Dit is 'n bedreiging vir ons kinders se toekoms."

– Volg Nuus24 op Twitter.

- AFP