Klimaat sal almal na noorde laat trek
2010-09-13 07:33
Johannesburg - Die res van die wêreld gaan weens klimaatsverandering “hel ervaar” en sal noordwaarts na die nou nog yskoue Skandinawiese lande wil verhuis waar volop vars water sal wees en kos geproduseer sal word.
Dít is die voorspelling van prof. Laurence C. Smith, geografiedosent aan die Universiteit van Kalifornië in die VSA, nadat hy 15 maande lank in die verre noordelike dele van die planeet in Rusland, Lapland, Kanada, Finland, Swede en Noorweë navorsing oor klimaatsverandering gedoen het.
Smith sê lande binne die Noordpoolsirkel is die enigstes wat in die volgende 40 jaar uit klimaatsverandering gaan voordeel trek.
Science Dailyhet die naweek in ’n verklaring gesê Smith meen elders gaan waterbronne opdroog, oeste misluk en natuurlike hulpbronne opraak.
Hy voorspel die Skandinawiese lande gaan ekonomies groot baat vind by klimaatsverandering en selfs daaruit ryk word.
As die olie- en steenkoolbronne in die res van die wêreld uitgeput is, gaan dié natuurlike hulpbronne – wat eeue lank onder die sneeu geberg was – vir groot rykdom in die koue noorde sorg, sê hy.
Volgens sy verslag, “The World in 2050: Four Forces Shaping Civilization’s Northern Future”, wat op 23 September uitgereik word, gaan klimaatsverandering chaos in die omgewing veroorsaak.
Hy voorspel die wêreld se bevolking gaan in die volgende 40 jaar met byna die helfte toeneem.
Natuurlike hulpbronne gaan daar ontbloot word presies wanneer dit in die res van die wêreld uitgeput is. As die see-ys in die Noordpool gesmelt het, sal Europa se droom van die afgelope 500 jaar – om direk oor die Noordpool met die Verre Ooste handel te dryf – volgens Smith uiteindelik bewaarheid word.
Vir sy navorsing in die noorde het Smith onderhoude gevoer met onder andere robjagters, takbokboere, vissermanne, mynwerkers, hoofde van oliemaatskappye, bioloë, klimatoloë, restauranteienaars, burgemeesters en bejaardes wat hul hele lewe op dieselfde plek gebly het.
Hy voorspel wild gaan die swaarste kry en sal nie by die vinnige veranderinge in die volgende vier dekades kan aanpas nie. Hy meen die grootste hoeveelheid spesies ooit gaan in die volgende vier dekades uitsterf.
- Volksblad