Kleuterskool moedig gelyke geslagsrolle aan
2011-06-27 22:08
Stockholm – By die Egalia-kleuterskool in Stockholm vermy die personeel
woorde soos “hy” of “haar” en word al die kleingoed as “vriende” aangespreek,
eerder as “meisies en seuntjies”.
Alles is op só ‘n manier georganiseer dat
kinders nie onderwerp word aan stereotipiese geslagsrolle nie.
“Die samelewing verwag van meisies om fyn en
oulik en mooi te wees, terwyl seuns manlik, grof en uitbundig is,” sê Jenny
Johnson (31), een van die onderwysers by die kleuterskool.
“Egalia bied kinders die ongelooflike
geleentheid om te wees net wat hulle wil wees.”
Die skool probeer egter nie geslagsrolle
uitwis nie, maar wel seker maak dat die tradisionele rolle wat seuntjies
aanneem nie belangriker geag word as dié van meisies nie.
So word die lego-blokkies byvoorbeeld reg langs
die speelgoed-stoof in die speelhoekie gebêre.
Op dié manier maak die kinders nie noodwendig ‘n
skeiding tussen die wêreld van konstruksie en dié van kookkuns nie.
Die aanvaarding
van huwelike tussen lede van dieselfde geslag word ook aangemoedig.
Daar is byvoorbeeld ‘n boek op die kinders se
boekrak oor twee mannetjie-kameelperde wat hartseer is oor die feit dat hulle
nie ‘n kind het nie, totdat hulle eendag op ‘n verlate krokodil-eier afkom.
Tradisionele families word ook uitgedaag – indien
die kinders tydens speeltyd stry oor wie gaan "ma" speel en wie "pa", sal die
onderwysers sommer voorstel dat hulle twee of drie ma’s en pa’s in die speletjie
inkorporeer.
Volg Nuus24 op Twitter.
- Sapa - AP