Kinders, ouers boelie graag onderwysers aanlyn
2011-08-17 13:13
Londen – Meer as ‘n derde van onderwysers word aanlyn geboelie en ‘n kwart van dié negatiewe aandag kom van geniepsige ouers af, het ‘n studie bevind.
Die sosiale netwerke Facebook en Twitter word dikwels gebruik om onderwysers wat kinders swak punte gee te intimideer, lui die studie van die Safer Internet Centre in Brittanje.
Sommige onderwysers word geboelie bloot omdat ouers nie van hulle hou nie, berig die Press Association.
Ouers was skuldig aan meer as ‘n kwart (26%) van die geboelie, het die studie bevind.
Die studie het selfs op een skoolhoof afgekom wat amper tot selfmoord gedryf is weens ‘n jaar se teistering aanlyn.
Die hoofnavorser en professor van sosiale verantwoordelikheid in die kommunikasiebedryf, Andy Phippen, het gesê hy het ‘n mate van mishandeling van die kinders verwag.
“Mens verwag dit van kinders, maar as ouers 12 maande lank ‘n onderwyser aanlyn teister is daar iewers fout,” het hy gesê.
– Lees meer hier.
– Volg Nuus24 op Twitter.