Kinders lieg slimmer as hulle swaar gestraf word
2011-10-28 07:01
Toronto – Kinders wat te swaar gestraf word vir hul stoutigheid leer om goed te jok.
So het navorsers bevind in ’n navorsingstudie wat pas in die joernaal Child Development gepubliseer is.
Kanadese navorsers het die studie gedoen met ’n groep drie- tot vierjarige kinders wat in dieselfde buurt in Wes-Afrika woon.
Een van die twee groepe is in ’n private skool waar baie tradisionele strafmetodes toegepas is.
Hulle is met stokke geslaan, oor die kop geklap en geknyp vir oortredings.
In die ander skool, ook privaat, is daar met die kinders geraas of hulle is gestraf deur hulle vir ’n tyd uit die klas te stuur.
Die kinders is in ’n eksperiment gevra om nie na ’n speelding te loer wanneer hulle alleen in ’n vertrek gelos is nie.
Die meeste kinders van al twee groepe kon die versoeking nie weerstaan om na die speelding te kyk nie.
Toe hulle daaroor uitgevra is, het byna al die kinders in die skool waar daar swaar gestraf word, gejok.
Net die helfte van die ander skool se kinders het gejok.
Die navorsers sê die bevinding het hulle verras omdat bestaande studies toon kinders wat kwaai gestraf word, het eerder kognitiewe agterstande.
“Een moontlikheid is dat die swaar strawwe kinders se motivering om strategieë uit te dink wat hulle help oorleef, stimuleer,” sê prof. Kang Lee van die Universiteit van Toronto wat by die navorsing betrokke was.
“Dit is duidelik dat lyfstraf nie kinders se neiging om te lieg verminder nie; dit verbeter eerder hul jokvaardighede.”
– Volg Nuus24 op Twitter