Kerk voer oorlog teen internet-porno
2011-11-01 14:16
Londen – Die Anglikaanse kerk van Engeland dreig om sy finansiële mag te gebruik om die golf van internet-pornografie te probeer keer.
Die kerk oorweeg om die miljoene wat hy in internet-diensverskaffers belê het te onttrek indien dié maatskappye nie aksie neem nie.
Kommer oor die toegang tot pornografiese beelde het meer aandag begin trek ná die bekendmaking dat Joanna Yeates se moordenaar, Vincent Tabak, ‘n obsessie gehad het met webwerwe waarin seksuele geweld, gebondenheid en verwurging gewys word.
Joanna Yeates was ‘n 25-jarige landskapargitek wat op 17 Desember 2010 in Bristol, Engeland vermis geraak het ná ‘n aand uit saam met kollegas.
Haar lyk is op 25 Desember 2010 gevind en nadoodse ondersoeke het getoon dat sy verwurg is.
Die polisie is onder druk om die ergste pornografie op dieselfde manier te hanteer waarop hulle beelde waarop kindermishandeling uitgebeeld word hanteer.
Sulke beelde word deur spesiale spanne met die regte hulpbronne ondersoek.
Internet-diensverskaffers soos Virgin Media, BT Broadband, AOL en Sky word skerp gekritiseer omdat hulle nie daarin slaag om kinders teen sulke walglike beelde te beskerm nie.
Die Anglikaanse kerk, wat ‘n groot finansiële hand in die internet-mark het, is besig om beleggings van miljoene te hersien.
Die kerk weier om in ondernemings te belê wat die probleme aanvuur wat Christene probeer verhoed.
– Lees meer by iol
– Volg Nuus24 op Twitter