Kenners waarsku oor koffie-skok
2012-11-08 13:40
Londen – Aardverwarming kan binne 70 jaar tot die uitwissing van wilde arabica-koffiebone lei, het wetenskaplikes gewaarsku.
Hoewel kommersiële koffieplantasies onder die regte toestande steeds moontlik sal wees, waarsku kenners egter dat die verlies aan wilde arabica, wat beter genetiese variasie bied, plantasies meer geneig sal maak om onder siektes en peste te ly.
Arabica-bone word gebruik vir meer as 60% van die wêreld se koffieprodukte, en ongeveer 4,86 miljoen ton is vanjaar op die mark verkoop.
'n Studie deur navorsers by Brittanje se Koninklike Botaniese Tuine, in samewerking met Ethiopiese wetenskaplikes, het getoon dat 38% tot 99,7% van die gebiede wat gebruik word vir die verbouing van wilde arabica, teen 2080 weens aardverwarming nie meer daarvoor geskik sal wees nie.
Omdat koffieproduksie baie afhanklik is van temperature, kan selfs geringe klimaatsverandering die toekoms van dié koffieboon, tesame met die verdienste van die miljoene mense wat daarvan afhanklik is, negatief beïnvloed.
"Die uitwissing van arabica-koffie is 'n skokkende en kommerwekkende vooruitsig," het Aaron Davis, hoof van koffienavorsing by die Koninklike Botaniese Tuine, wat die studie gelei het, gesê.
Navorsers het rekenaarmodelle gebruik om die invloed van stygende temperature in gebiede waar arabica verbou word, te ontleed.
Die uitslag, wat in die Public Library of Science-joernaal, ook bekend as PLOS ONE, gepubliseer is, dui op 'n "uiters negatiewe invloed" op die aantal wilde arabica-bevolkings, het die navorsers gesê.
– Volg Nuus24 op Twitter.
- Reuters
