Kenners krap kop oor eiland 'wat nie bestaan'
2012-11-22 17:45
Sydney – ‘n Eiland in die suidelike Stille Oseaan wat op Google Earth en op wêreldkaarte aangedui word, bestaan nie, het Australiese wetenskaplikes gesê.
Die wetenskaplikes het as deel van ‘n geologiese ekspedisie na die misterieuse eiland gaan soek.
Die eiland, wat in die Koraalsee, tussen Australië en Nieu-Kaledonië voorkom, is bekend as Sable-eiland en verskyn op Google Earth en Google Maps.
Die Times Atlas of the World identifiseer ook die eiland as Sable-eiland.
Toe die wetenskaplikes egter die eiland op die presiese koördinate gaan soek het, kon hulle dit nie opspoor nie.
“Ons wou gaan kyk het hoe lyk dit daar, want navigasiekaarte dui aan dat die water daar sowat 1 400m diep is, wat nogal aansienlik diep is,” het dr. Mari Seton, een van die wetenskaplikes, gesê.
“Die eiland is op Google Earth en ander kaarte, maar toe ons daarna wou gaan kyk, was daar geen eiland nie. Ons is nogal stomgeslaan. Dit is regtig bisar.”
“Hoe het die eiland dit dan op die kaarte gemaak? Ons weet nie, maar ons beplan om uit te vind.”
– Volg Nuus24 op Twitter
- AFP
