Kees maak moles in man se huis
2010-11-20 08:01
Seugnet Esterhuyse
Pretoria - ’n Volwasse bobbejaanmannetjie het Vrydag groot verwoesting gesaai in ’n huis in Hebron, naby Ga-Rankuwa, noordwes van Pretoria.
Isaac Moche, eienaar van dié tweeslaapkamerhuis, is nog verstom dat die bobbejaan in dié huis kon inkom.
“Ek was vroeg Vrydagoggend besig om buite (die huis) te bad toe ek iets harigs by my huis sien ingaan,” het Moche gesê.
Moche het dadelik die deur toegemaak en die Ga-Rankuwa-polisiekantoor om hulp gebel.
Dié kon hom egter nie help nie en die hulp van Tshwane-natuurbewaring is ingeroep.
Hencke Marais van Tshwane-natuurbewaring se spesialiteitsdienste het kort daarna opgedaag.
Marais het gesê dat die bobbejaan al teen dié tyd “alles in die huis omgekeer” soos hy probeer uitkom het – tot die TV, wat gelukkig nie beskadig is nie. Hy het ook aan al die aartappels en tamaties in die huis gehap, maar niks gevreet nie. Hy het ook die hele huis bemis, sê Marais.
“Ek moes die bobbejaan, wat in die huis se dakbalke geskuil het, in byna stikdonkerte met ’n veerpyl skiet om hom te verdoof.”
Nadat Marais die sneller getrek het, het hy gewag vir die verdowingsmiddel om te begin werk.
Minute later het Marais, Moche en omstanders, wat intussen buite saamgedrom het, gehoor hoe die dier agterop Moche se bakkie in die motorhuis beland.
Marais het die bobbejaan toe in ’n hok gesit en op sy bakkie gelaai.
“Dit is ’n volwasse mannetjie tussen ses en agt jaar wat meer as 20 kg weeg. ’n Trop het hom heel waarskynlik in die Hartbeespoort-omgewing uitgeskop en hy het sy weg hierheen gevind.”
Die dier is laat gistermiddag tussen Hammanskraal en Cullinan vrygelaat.
- Beeld