Karoo: Sasol verras met besluit
2011-12-02 08:00
Port Elizabeth – In ’n verrassende wending het Sasol nie net aangekondig dat hy voorlopig afsien van sy planne om skaliegas in die Karoo te ontgin nie, maar ook dat hy die regering se moratorium op dié aktiwiteit steun.
Shell, daarenteen, het gistermiddag gesê hy bly verbind tot sy ontginningsvoorneme in die Karoo.
Dié oliereus se aansoek om eksplorasieregte lê reeds by die Petroleumagentskap van Suid-Afrika (Pasa) vir goedkeuring.
Maar dit moet nou wag totdat die moratorium, wat in April ingestel is, opgehef word.
Vroeër is Februarie 2012 as die teikendatum hiervoor gegee.
Sasol, in vennootskap met die oorsese maatskappye Chesapeake en Statoil, het al in November 2010 met uitgebreide tegniese navorsing oor die gaspotensiaal in die Karoo begin.
Die staatsvergunning vir dié studies het op 17 November 2011 verval.
Die volgende stap sou wees om, soos Shell, aansoek om eksplorasieregte te doen, maar nou het Sasol besluit om voorlopig eers van sy Karoo-gasplanne af te sien.
“Sasol sal egter die Suid-Afrikaanse gasontginningslandskap bly monitor vir nuwe ontwikkelings,” het Christine Ramon, finansiële hoof, gesê.
“Sasol ondersteun die moratorium, want tans doen die regering belangrike werk om daadkragtige- en wêreldklas-regulasies vir skaliegasontginning saam te stel,” het Jacqui O’Sullivan gesê.
In sy reaksie op Sasol se besluit, het Jan Willem Eggink, hoofbestuurder van Shell SA Upstream, gesê dit sal sy maatskappy nie beïnvloed nie: “Ons is nog steeds verbind tot skaliegasontginning in die Karoo.”
– Volg Nuus24 op Twitter.
- Volksblad
