Kapenaar bedink unieke alternatief vir duur gesigroom
2012-11-20 16:39
Kaapstad – ‘n Kaapse vrou wat beïndruk was met 'n advertensie vir gesigroom wat slakke se slym bevat, het haar eie, unieke skoonheidsroetine geskep omdat sy nie dié room kon bekostig nie.
Edith Pangle (62) van Silvertown het besluit om sommer self slakke te versamel, wat sy elke week as deel van haar skoonheidsroetine oor haar gesig laat seil, het die Daily Voice berig.
“Ek kan nie die duur room van slakke uit Frankryk bekostig nie. Dit is toe dat ek die slakke begin versamel en dit gebruik,” het die 62-jarige Pangle gesê.
Pangle het die slakke in vriende en familie se tuine versamel. Sy hou dit in ‘n groot sak in haar kamer aan en gebruik dit minstens een keer per week.
“Ek het my slakke by my. Ek hou hulle vir weke in my pakkie en ek hoef hulle nie eens te voer nie.”
Sy laat die slakke vir min of meer 15 minute oor haar gesig, nek en hande seil, waarna sy water daaroor spat.
Pangle het selfs al 'n paar van haar vriendinne van die doeltreffendheid van die behandeling oortuig, en hulle wil dit ook begin gebruik.
“As ‘n vrou ‘n sekere ouderdom bereik moet sy na haar vel begin kyk, en hierdie plan kos my niks.”
– Volg Nuus24 op Twitter
- SAPA
