Kantore van binnelandse sake kry webkameras
2011-09-20 08:05
Kaapstad – Die kantore van die departement van binnelandse sake gaan met webkameras toegerus word om die kans op korrupsie of foute te verklein.
Amptenare sal hierdeur van ’n sentrale punt soos die Pretoriase hoofkantoor, gemonitor kan word.
Die herontwerpte Wynberg-streekkantoor, wat na die Maynard-winkelsentrum geskuif het, sal voor die einde van die huidige boekjaar met sulke kameras toegerus word, het Fatima Chohan, adjunkminister van binnelandse sake, gesê. Sy het dié kantoor – wat daagliks sowat 300 kliënte bedien – gisteroggend amptelik geopen.
Volgens haar is die webkameras baie belangrik.
“Georganiseerde misdaad kan nie sonder ons dokumente plaasvind nie. Daar was die afgelope paar maande baie berigte oor amptenare wat in hegtenis geneem is in ’n poging om korrupsie in ons kantore hok te slaan.
“Amptenare moet hulself as die eerste in die aanvalslinie teen misdaad en veral georganiseerde misdaad in die land beskou. Ek hoop ons amptenare sal dit verstaan en hulself in dié lig sien.
“Die webkameras sal die gerusstelling verskaf dat ons sekerheidstelsels nie geskend word deur korrupsie of foute nie. Kantooraktiwiteite sal deur die kameras gemonitor word met die oog daarop om die risiko’s op kantoor te verklein,” het sy gesê.
Yusuf Simons, provinsiale bestuurder, het gesê sodra die kameras geïnstalleer is, sal die aktiwiteite uit Pretoria gemonitor kan word. “As die hoofkantoor dink dit is nodig om in te gryp, sal hulle dit dadelik kan doen.”
Vusumuzi Mkhize, adjunk-direkteur-generaal, het gesê die plan is om die kameras landwyd aan te bring.
– Volg Nuus24 op Twitter.
- Die Burger